e shtunë, 26 mars 2011

عندما يهتز الوجدان حزنا لمرضك


عندما يتحدث الحنان,, ونلمس البركة ,, ونشتاق إلى الأمان
,,عندما تبكى القلوب
,, عندما نستجمع قوانا صبرا على بعادك
,, عندما نشتاق إلى دعاء صادق
,,عندما نفتقد رؤية ابتسامتك الصافية
,,عندما يهتز الكيان ألم
,,عندما تبكى كل العيون ببكائك
,,عندما يتحد الجميع بالدعاء لكى بنفس الدعاء

حينها فقط نعلم أنكِ فعلا "بركة" تتوسطنا

جدتى ... اشتقت إليكِ بكل وجدانى

أسأل الله العظيم رب العرش العظيم أن يشفيكى
أسأل الله العظيم رب العرش العظيم أن يشفيكى
أسأل الله العيظم رب العرش العظيم أن يشفيكى
أسأل الله العظيم رب العرش العظيم أن يشفيكى
أسأل الله العظيم رب العرش العظيم أن يشفيكى
أسأل الله العظيم رب العرش العظيم أن يشفيكى
أسأل الله العظيم رب العرش العظيم أن يشفيكى

اللهم رب الناس اذهب البأس اشف أنت الشافي لا شفاء إلا شفاؤك شفاء لا يغادر سقماً




أسأل الله لكِ شفاء من كل داء

ربنا يرجعك لينا بالسلامة

e diel, 8 gusht 2010

همسات

_**_**_**_**_**_**_**_**_**_**_**_**_**_

يوم 6-8 اللى فات كان يوم ميلادى ال 21..بس فعلا كان يوم رائع بمعنى الكلمة

يعتبر أفضل يوم ميلاد عيشته من ال 21 عام اللى فاتوا

وأتمنى ان الاعوام اللى جاية تكون أفضل من اللى فاتت وأنا متفائلة جدااااا المرة ديه

من جهة تانية عايزة أوجه رسائل وهمسات لناس معينة أثرت فى حياتى


رسالة لأمى اللى علمتنى يعنى ايه أشوف الدنيا بحب,, ويعنى ايه منامش وانا زعلانة من حد ,,علمتنى معنى الحنان علمتنى اسامح علمتنى العطاء وحاجات كتييير

رسالتى ليها :: فخورة أنك أمى ...ربنا يباركلى فيكى ويجعلنى زيك

رسالة لبابا اللى عرفت منه معنى الرجولة بجد , معنى المسئولية معنى التضحية والوفاء

رسالتى ليه :: ربنا يباركلنا فيك وتشوفنا انا واخواتى زى ما بتتمنى وبحمد ربنا انك بابايا

رسالتى لنينتى :: ربنا يباركلنا فى صحتك يا أنقى قلب عرفته فى حياتى واحنا فى خير بفضل دعائك لينا وانتى بجد بركة ربنا أنعم علينا بيها

رسالتى لأخواتى :: ربنا يربط على قلوبنا بحبنا لأهلنا و يقرعين أهلنا بينا ويجعلنا ذريتهم الصالحة ونكون استمرار لرسالة بابا وماما ونوصل اللى اتعلمناه منهم لذريتنا وأحفدنا _بإذن الله_ ..بحبكم ومبسوطة ان انتم بالذات اخواتى

رسالتى لأصدقائى:: بحبكم جداااااااااا و نفسى نرجع زى زمااااااان

رسالتى للإنسان اللى غير معنى حياتى واللى خلانى أعرف يعنى ايه مشاركة واحتواء .. ويعنى ايه ان الحب احترام وتقدير .. ويعنى ايه تكون عايش وهدف من اهدافك انك ترضى شخص معين

رسالتى ليه :: شكرااااااااااا جدا انك معايا .. وشكرا انك بتدخل السعادة على قلبى .. أنت بجد فضل من ربنا عليا .. ربنا يخليك ليا ويرضى عنك ويباركلى فيك ويجعلنى عند حسن ظنك

رسالتى لنفسى :: التوفيق خير قائد .. وحسن الخلق خير قرين .. والعقل خير صاحب .. والأدب خير ميراث

فيا رب اجعلنى ابنة بارة .. وأخت مُعينة .. وصديقة وفية .. وموظفة خلوقة .. وزوجة صالحة .. و أم عاقلة نافعة

أما وصيتى لذريتى _إن شاء الله_ ::مش هلاقى أنسب من قول سيدنا على رضى الله عنه " خالطوا الناس بألسنتكم وأجسادكم وزايلوهم بأعمالكم وقلوبكم ,, فإن للمرء ما اكتسب ,, وهو يوم القيامة مع من أحب" ربنا يجعلكم ذرية صالحة وتكونوا من حفظة القرأن

أختم كلامى بقول سيدنا على رضى الله عنه : "إذا وصلت إليكم أطراف النعم فلا تنفروا أقصاها بقلة الشكر" فالحمد لله إن ربنا كرمنى وكنت جزء من حياة كل واحد من عيلتى لانهم بجد نعم الأهل

واسأل الله الذى جمعنا فى دنيا فانية أن يجمعنا ثانية فى جنة عالية قطوفها دانية




e premte, 7 gusht 2009

يوم ميلادى العشرين..تأملات وتجارب وعظات






وحشتينى أوى يا مدونتى...أوقات كتيرة كنت ببقى عايزة أجيلك وأفضفض معاكى ..

النهاردة جيت عشان أعرفك ان امبارح فات من عمرى 20 سنة ومش عارفة المفروض ابقى فرحانة ولا حزينة...
المهم ..أنا جيت النهاردة بالصور ديه واوعدك انى هجيلك قريب اوى احكيلك شوية حاجات وافضفض معاكى, واحكيلك اللى استفدته واللى اتعلمته فى الفترة الأخيرة
:)

e shtunë, 27 dhjetor 2008

فلنكن انفسنـــا





نهـــــارك هـــائمٌ وليلك نائــــــم


كذلك على الأرض تعيش البهائم


_________________________________________

الفترة الاخيرة بدأت اكتشف نوعية جديدة من الأشخاص لم اكن ادرى بوجودهم

والعجيب ..انهم كانوا اقرب الاشخاص منى وكنت اظن انى على دراية كافية بما يدور فى اذهانهم وبما تجول به خواطرهم حيث اعتبرتهم جزء منى لا ينشطر ابدا لتقاربنا الفكرى والعقلى بل وتقاربنا الروحانى

اظن انى ايضا فى اعتقادى الماضي لم اكن مخطئة..حيث انهم فعلا كانوا كما ظننت ..ولكن كثيرا ما يتحول اشخاص منا عن ما ظننا

وأحيانا يكون ما فرضته الحياة طبع ملازم لاشخاص حادوا عن اهدافهم

لانهم نسوا ما ارادوا بل ارادوا ايضا ان ينسوا ما كانوا عليه..فقط لكى يتماشوا مع دوامة الحياة

اتبعوا منهج التقليد الاعمى بل والساذج ايضاالذى يحول بينهم وبين انفسهم ليرتدوا اقنعة لا تناسبهم بل ولا تتماشى مع منهجهم وما يتطلب ان يكونوا عليه, بل واكثر من ذلك حيث بعدوا عن ما أمرهم دينهم ان يكونوا عليه

نسوا ان الله خلقهم ليكونوا انفسهم

هؤلاء الأشخاص أنسب ما يوصفوا به "الضعفاء" لان العقل يقول ان من يتبع "ضعيف" ويظن ان المُتبع هو "الاقوى"

وهنا أقف لأناشد اى انسان حكم على نفسه بأنه ضعيف دون أن يدرك ان من ظن انه قوى ما هو الا مجرد صورة مرسومة لانه اتبع القوة الخاطئة الوهمية

واقولها باعلى صوتى واملى ان يصل صوتى لجميع ارجاء هذا الكون


لا للضعف والاستسلام الذى غزا عقول الكثير منا

لا للأقنعة المزيفة التى ارتدتها أناس ظنوا أنهم اقوياء

لا لتغير منهج حياتنا على سبيل التجربة

لا لنبذ الذات ونكران النفس

لا للحيود عن الاهداف

فلنكن أنفسنــــــــــــــا


واختم بتلك المقولة:" لا تأخذوا ببادئ الرأي ومبهم القول، ولا تجاروا العرف الخاطئ والاصطلاح الجائر، ولكن فكروا وحددوا، فإن التفكير السليم والتحديد الدقيق يرفع بين الناس الخلاف ويقرب على الأقل بين وجهات النظر ".





e shtunë, 18 tetor 2008

اعترافات ابنة من بنات حواء





احساس جميل جدااااااا انى احس بالتغيير ولو كان بسيط

احساس اجمل لو التغيير ده استمر دايما للافضل

كتير بحس انى بصدر قرارات وببقى عندى رغبة شديدة فانى اعرف نتيجتها, رغم انه مش قرار من قراراتى المصيرية, بس ممكن ادرجه تحت القرارات التمهدية للحياة اللى بدور عليها
كتير جدا بتصادفنى لحظات ضعف..وبالعكس تماما وممكن يكون في نفس اليوم تصادفنى لحظات قوة..(ممكن ده جزء جنونى فيا؟!!!) بس عندى يقين ان موصلتش لحد التقلب في الشخصية!!

سعادتى في لحظة القوة بتدينى لحظة فخر ولحظة أمل ولحظة تفاؤل, وبرضه بتدينى لحظة خوف


لحظة الخوف ديه بيكون سببها انى خايفة انى افقد لحظة القوة اللى حسيت فيها بالحياة بجد

وفى لحظة القوة ديه بقرر فيها قرارات كتيييييير, بستعجب بعد كده انا اخدتها ازاى وفي نفس الوقت ببقى سعيدة اوى انى اخدتها ..والحمد لله بتكون في الوقت المناسب وده طبعا توفيق من ربنا


المهم


عايزة
اعيش حياتى وربنا راضي عنى

..عايزة
اعيش حياتى..بس اكون أنا

وعايزة
اعيش حياتى..بدون ضعف

وعايزة
اعيش حياتى بقوة

وعايزة
دايما اخد قراراتى في لحظات القوة
وعايزة
أعيش حياتى من غير ما حد يزعل منى ومن غير ما ازعل من حد


وعايزة ..وعايزة ..وعايزة......الى مالا نهاية

وهاخدها فرصة واعلن فيها انى مسامحة اى حد ومش زعلانة من اى حد وياريت كل حد يعرفنى يسامحنى لو زعلته يوم


ملحوظة...ديه كانت لحظة فضفضة ابنة من بنات حواء









e hënë, 13 tetor 2008

نعمة..ويارب تدوم




حالة رضا نفس وراحة بال




حالة قناعة وتفاؤل وأمل وصفاء نفس

يارب ديمها نعمة واحفظها من الزوال


e mërkurë, 27 gusht 2008

ولتسقط الأقنعة


الصورة ديه رغم انها مجرد رسمة بس انا حسيتها في ناس كتير..
في ناس فعلا بالمنظر ده..طبيعتهم انهم بدون ملامح لكن بسهولة جدا بيركبوا القناع المناسب للموقف اللى حواليهم علشان يعرفوا يمشو في الدنيا او بمعنى تانى يوهموا اللى حواليهم انهم بملامح طبيعية.
ساعات بينجحوا في كده وديه بتبقي مهارة في التمثيل..وساعات تانية بيفشلوا وبيظهروا بدون ملامح تانى! وديه مشكله في حد ذاتها مش صغيرة بالنسبة ليهم شخصيا لانهم ممكن فعلا يكونوا بيتعبوا علشان يظهروا للى حواليهم كده وفي الاخر بيملو ويتعبوا ويسقط فعلا القناع ..وبالنسبة كمان للناس اللى حواليهم لو فعلا اتخدعوا فيهم بتبقي مشكلة لانهم مش هيقدروا يحددوا الشخصية ديه سماتها ايه واستحالة التفاهم معاهم
بس لازم الانسان يواجه فعلا النوعيات ديه في الدنيا علشان يعرف بعد كده يفرق بين الناس اللى بملامح فعلا والناس اللى بترسم ملامحها
وربنا يكفينا شرهم